Events

പാരമ്പര്യ പൂജകൾ നടക്കുന്ന ഒരു ക്ഷേത്രം എന്നതിലുപരി , ഒരു ആത്മീയ സാധനാസ്ഥാനം എന്ന നിലയിൽ ഈ കോവിലിനെ ഉയർത്തിക്കൊണ്ട് വരികയാണ് ഞങ്ങളുടെ ലക് ഷ്യം.   

 

ഭക്തിയുടെ പ്രകടനപരതയ്ക്കപ്പുറത്ത് , വ്യക്തിയുടെ ആദ്ധ്യാത്മികമായ വികാസം ഇവിടവുമായുള്ള സമ്പർക്കത്തിലൂടെ സംഭവിക്കണമെന്ന് ഞങ്ങൾ ആഗ്രഹിക്കുന്നു. അതിലേയ്ക്ക് പുതുതലമുറയെ ക്ഷണിക്കുന്നതിന്റെ ആദ്യപടിയെന്ന നിലയിൽ , വിദ്യാർത്ഥികൾക്ക് സരസ്വതീപൂജ സ്വയം ചെയ്യാനാവുന്ന ഒരു മണ്ഡപം ഇവിടെയുണ്ടാവും. ഭാഷാ പിതാക്കളായ തിരുവള്ളുവറിന്റെയും , എഴുത്തച്ഛന്റേയും വിഗ്രഹങ്ങൾ പ്രതിഷ്ഠിച്ചിട്ടുള്ള ഈ മണ്ഡപത്തിൽ , കുടുംബത്തിലെ വല്യണ്ണാവിമാർ ഉപയോഗിച്ചിരുന്ന നൂറ്റാണ്ടുകളുടെ പഴക്കമുള്ള നാരായം (എഴുത്താണി) അർച്ചനാബിംബമായി ഉണ്ടാകും. 

 

സത്സംഗങ്ങൾ , ആധ്യാത്മികവിചാര സദസ്സുകൾ , ഭജനമണ്ഡലികൾ , പ്രഭാഷണങ്ങൾ , ധർമ്മാനുബന്ധമായ മറ്റ് സദസ്സുകൾ തുടങ്ങി സനാതന ധർമ്മവുമായി ബന്ധപ്പെട്ട കാര്യങ്ങളുടെ നിരന്തരമായ സാന്നിദ്ധ്യം വരുംകാലപ്രവർത്തനങ്ങളുടെ കാര്യക്രമങ്ങളിൽ ഉണ്ടാകും.